സ്വാർത്ഥർ

ബാല്യം നിറഞ്ഞാടിയ തൊടികൾ., 

ഓടിയൊളിച്ചു കളിച്ച എന്നെയും നിന്നെയും കൂട്ടരേയും കാണാത്ത പുല്ലില്ല പൂവില്ല കായില്ല മരമില്ല.. ഇടംകണ്ണിട്ട് ചിരിക്കയല്ലാതെ അവരാരും ഒന്നും മിണ്ടിയില്ല, ആർക്കുമാരെയും കാണിച്ചു കൊടുത്തില്ല. കളിയുടെ രസം കളയാതിരിക്കാൻ അവർക്കറിയാമായിരുന്നു.
പണ്ടു മുതലേ അവരങ്ങനെയാണ്, നമ്മുടെ സന്തോഷത്തിനും നന്മക്കുംവേണ്ടി നിലകൊള്ളുന്നവരാണ്. ഇതെല്ലാം കണ്ടു വളർന്നിട്ടും നമ്മളെന്തേ ഇത്ര സ്വാർത്ഥരായി??
വേരടക്കം ഓരോന്നും പിഴുതെറിയുമ്പോഴും പുല്ലും പൂവും കോൺക്രീറ്റിനടിയിലേക്ക് ചവിട്ടിയരക്കുമ്പോഴും നമ്മൾ കണ്ണടച്ചു കളിച്ചു കൊണ്ടേയിരിക്കുകയാണ്. കളി കാര്യമായതറിഞ്ഞിട്ടും ഒന്നും അറിയാത്തപോലെ നമ്മൾ തകർത്തഭിനയിച്ചു കൊണ്ടേയിരിക്കയാണ്.